نايف الصويمل

الأرشيف حسب سبتمبر 2009

مدخل ..

يعني اليوم راجع ..

عقب غيبت سنين ..

جاي تقلب المواجع ..

ما بقى عندي حنين ..

الخاطرة ..

ليه راجع بعد الغياب … ليه توك رجعت …

ليه ومليون ليه في بالي يومك رجعت …

كنت أظن أنك نسيت .. ولا هقيت أنك ما نسيت …

لين شفتك قدام عيني ترتجي رجعت غلاك …

وأنا في داخلي جرحك من العام ما طاب …

لكن مع كل جروحك … تصدق ما نسيتك …

لا وربي ما نسيت …

باقي على نفس الوفاء …. ما تعودت الجفا …

ودي أحضنك حيل … لا ودي أتنفسك …

ودي ما يوم أفارقك … أبقى معك …

بس ما قويت …

كل شيء في داخلي … يحترق ..

كل دمع العين فيني .. ينهمل …

كل جرح .. وكل دمع .. وكل شيء …

حتى إحساسي معك .. لا مو معك …

مدري ولكن يعشقك .. بتنفسك .. يحتاج لك …

بس ما قويت ..

عزتي تصرخ تنادي … من داخلي ..

 نسيت كل هذي السنين …

نسيت دمعك والألم …

نسيت قلبك والقهر …

نسيت نار الحنين … وشوق السنين …

لا ما نسيت …

لا تعتذر بباقي ذكرياته …

 بكل شيء عندك بقى له …

ما بقى له في داخلك غير الألم ..

غير الحزن … غير طعنات الغدر …

لا تجبر خيالك يأخذك …

 يرجع لذيك السنين …

يومه معك … قبل لا يتركك …

لعبة في يدين السنين …

مخرج ..

بعد كل هذي السنين …

يبي مني أعذره …

و شلون اعذره …

وما بقى فيني حنين …

يا الله وش القصة وربي مو عارف وش إلي صاير أنا وش فيني لي يومين مو على بعضي , أناظر في المرايا وأشوف وجهي وأتعوذ من إبليس , أحاول أنام واحلم بوجهي مدري وش يبي وجهي هذا , في كل مكان معي , حتى يوم أناظر المرايا يكون قدامي , مدري وش يحس فيه , ودي في يوم اصحى ويكون مالي وجه يعني يكون ممسوح ولا فيه شيء , يا أخي مليت كل الناس تغير إلا أنا وش القصة ,,

أحس أحيانا أن فيه طيارات في السماء تطير وتدور حول بعض , مرات أحس أن هذي الطيارات مجرد حشرات يبي لها بف باف وتزول ..

لا حول صرت أضيع بيني وبين نفسي يعني أنا أنا ولا مو أنا يمكن واحد ثاني يفكر بدالي ويمكن غيري صار مكاني ويمكن أنا بس مو عارف نفسي بس الأكيد لو كنت أنا ما راح أكون أنا لأني أنا مو أنا …

هم كثار الناس بس قليل الناس يعني مرة ومرة مثل الكورة إلي اشوتها وتضرب في العارضة ولا تجي هدف , تضرب في العارضة ويصير الغلط على المدرب ليه أنه خلها تضرب في العارضة مع انه الغلط مو من المدرب بس المشكلة فيني أنا ليه مو أنا …

بجد صرت ضايع وين عيني اليمنى ما عاد أشوف فيها لأن العين اليسرى صارت تشوف في جهة أخرى , مدري السبب مني أو منها أو من تفكيري أو من الطيارات الخاصة إلي تطير فوق رأسي …

شكل النظام هنا غلط عفوا كلامي كله صاير فيه ضياع بضياع يعني يا كثر ناس معي تسولف وقليل الصادقين ..

أمس جاني اتصال في الليل كان فيه شيء حسيت نفسي معه ضايع قال لو تخلط التراب في الماء وش راح يصير طبعا قلت بيصير طين قال حلو بس لو بدل الماء بيبسي وش راح يصير أنا بصراحة مدري وش يصير بس لو أجرب أكيد راح اعرف وش إلي بيصير بس في نفس الوقت أنا مو أنا كيف أجرب أجل ؟؟؟

يعني لو أقول فيه واحد يحب وحده وهذي تحبه بس ما يعرفها ولا تعرفه بتقولون كيف يحبها نفس الشيء هنا أنا لو اخلط التراب في البيبسي ولا واحد يعرف الثاني كيف اجل تقولون تصير تجربه جديدة …

صدقوني بتقرون الموضوع الف مرة ويمكن مرة أو عشرة ولا راح تفهمون شيء ولا يوم راح تفهمون لأني مو فاهم ليه أنا مو أنا ؟؟؟

أسهل عليك اللعبة كل واحد يجيب ورقة وقلم ويكتب معي …

1+ 14 + 45+ 01+22= 2- 36-70 + 25

هذي معادلة بسيطة يختلف الكل في حسابها ناس بتسوي نفس العملية وناس بتحذف من هناك وهناك وناس بتقول هذا رايق ولا عنده شيء وكثير الكلام عليها أنتم وش رأيكم هي صح أو غلط ؟؟؟

أكيد صح بس في نفس الوقت غلط لأنه ما يوم جمعنا العدد صح ركزوا أكثر على الأرقام فيها شيء غلط أو لا ؟؟؟

كيف يجي واحد على يساره صفر معقولة هذا الصفر بدون قيمة ؟؟؟ طيب لو ماله قيمه ليه كتبناه ؟؟؟

خلونا نفكر شوي لو بدل الصفر رقم ثاني بيصير شيء ثاني ولو بعد الصفر رقم غيره وش بيصير بعد نتيجة ثانية وطيب لو الصفر على اليمين بيتغير طيب لو ما فيه صفر وش بيصير ولا شيء بس هي صح ليه جلستوا تفكرون أغريتكم بالكلام أو ما عندكم ثقة في حسابكم ؟؟؟

تدرون مرات أحس إني يومي متغير بسبت هذا الصفر على اليسار يعني مالي قيمة مو هنا ولا هناك بس عند ناس معينة الغريب إن الناس هؤلاء راحوا بعيد مرة ولا عاد لهم حس ولا خبر بس فيه ناس ثانية حولي أعرف أنهم يعرفوني بس اسكت ..

أنا وش قاعد أقول والله مدري أنتم تدرون ؟؟

ترى تفكيرنا غلط والله غلط ولا عندنا ثقة في نفسنا ولا نواجه الناس ونقول حنا غلط مو عيب العيب نسكت ونحمل غيرنا الغلط …

أقول ليه أنا أفكر بيني وبين نفسي والطيور تطير بأرزاقها !!

أشوفكم على خير أحسن يمكن يكون السنين الجاية أفضل …

ازعل عليك ,,

ارجع أراضيك …

وأقول أنا غلطان ..

حقك عليا …

لأجلك أبيع الناس .. يا زين وأشريك ..

يكفي وجودك …في حياتي شويا …

أفرح لشوفك …

أفز لطاريك …

أحضنك …

يا صاحبي في يديا ..

اعرف ..

ما كل ما تتمنى يجيك …

وأنا تمنيت تكون ليا …

أسهر الليل …

خوفي ما الأقيك ..

بسألك بالله !! وش يصير فيا ؟؟؟

بموت …

في خيالي أحاكيك …

وأنا بدونك ميت بليا !!!

اعذريني …

كان قصرت في حقك كثير …

أدري أن الخطأ مني .. وأنا كلي خطأ …

لو أكتب الحرف لجلك وعليه أزيد …

من معاني شوق قلبي ما وفت …

اعذريني …

لا بغيت أشكي من جور السنين …

ومن ظلام الوقت ومفرق مدمعه ..

أعلمي أن في داخلي نار الحريق ..

إلي من غيابك ما لقت من يخمده ..

اعذريني …

المعاني في حضرت جنابك تضيع ..

والحروف إلي وصفت شوقي ما وصفت ..

أتضح لي في زماني حاجتين …

محبتك فوق عزتي تطاولت ..

وجرحي في غيابك ما لقيت من يجبره ..

اعذريني …

كل هذا وما بقى عندي رصيد ..

غير نفسي ..

ونفسي من حياتي طايبه ..